Ilir Levonja: Mihal, mirë ja bëre!

Bota virtuale është mbushur e gjitha me një shfrymë sharjesh karshi një Mihali. Ky një qytetar që ka një biznes të vogël dhe që shfrymëxhinjtë e quajnë resort turistik. Megjithëse është një godinë rruge e sajuar me metodat shqiptare nga katrahura e pronave, e përfitimit me mik e me rryshfet, apo qasje politike, ku rrezik shiritin e inagurimit e ka prerë vetë kryeministri, e quajnë resort. Kushedi me një drekë me karkaleca ose me lëshimin e një dhome për 1 orë seks mund ta kenë futur edhe në kalendat e guidave turistike etj., si arritje qeveritare në atë kakofoninë e turizimit elitar ku Shqipëria po ia kalon edhe Francës a vendeve tashmë me traditë të lashtë apo e thënë shqiptarçe, ujqërve rreth pellgut të mesdheut.

Kësisoj Mihali është një produkt i atyre që e krijuan dhe zellin e të të rrahurit e ka pjesë të sojit, të temperamentit shqiptar, soj që 99% të rrugëve të së drejtës e kërkon me gëdëpje. Eshtë produkt atij informaliteti shqiptar ku tjetri shpallet guidë dhe në rrugë e sipër të heq qafe për një varëse floriri. E atij informaliteti ku policia bën sehirxhiun dhe nuk ndalon dhunuesit, por fut brenda të dhunuarin. Megjithatë promovojmë vendin si elitë e turizmit, si perlë e ballkanit pa e ditur dhe pa pranuar kurrë seriozitetit e termit turizëm elitar.

Dhe po t’ia thuash këto kryeministrit rrezik të të rrahi ai, jo më Mihalët e informalitetit shqiptar që ia thyejnë kokën ndonjë nënpunësi të ndershëm që afrohet të bëj detyrën. Sikur mos ta kisha parë videon do shfryja edhe unë, por e pashë dy a tri herë. Po mirë more zotërinj, mirë Mihali iu dogj siguresa, gjak shqiptari, u ndje i fyer, u ngrit kërceu mbi makinë etj., po ai që drejtonte mjetin ku shkonte?

Çfarë do ndodhte sikur Mihali t’i rrëzohej tek gomat. Ai që shoqëronte në vend të parë e që shante me aq zell shqiptari sa ta mbushte gjoksin? Po këta çibanet spanjollë që njohin botë, kaq të vështirë e kishin të paguanin një sillë tek Mihali? Dhe kurrë Mihalit mos t’i shkelnin më në derë?! Për këta nuk ka ligje Shqipëria? Në fund të fundit ku ta kërkoj të drejtën Mihali a Mihalët shqiptarë?

Këta nuk përbëjnë asnjë kundravajtje? Se kështu i bie, po ngrihemi e po hamë kudo, kurdo, ngado, e po ikim pa paguar se nuk na pëlqen ushqimi dhe shërbimi. Parashikon ligji shqiptar gjë në këtë rast? Se më duket sikur po i bini më kot më qafë Mihalit. Në fund të fundit të shtroi tavolinën, të shtroi pjatat, të shërbeu dhe ti ngrihesh e ikën duke i thënë nuk më pëlqeu por fërkon edhe barkun.

Nga ana tjetër çfarë të bëj ky që shërben? Kujt t’i drejtohet? Policia kalon në rrugë aty dhe as që përzihet. Sikur ta dinë shqiptarët se sa histori ka me të pa paguar nga kecat e pushtetit, nga të fortët etj. Ku ta plasin kokën Mihalët e pika resorteve tuaja? Ngrihet ministri e kryeministri i kërkojnë falje spanjollëve, guidës e shoferit. Këta duhet të ishin në gjyq si Mihali, me Mihalin. Kjo do ishte drejtësia e duhur.