Ambasadori Soreca: BE nuk e pranon paketën antishpifje për mediat online

Ambasadori i Bashkimit Europian (BE) në Shqipëri, Luigi Soreca, u shpreh sot publikisht kundër planeve të qeverisë “Rama” për të rritur kontrollin ndaj medieve online.

Z.Soreca, tha se Autoriteti i Medias Audiovizive (AMA) nuk mund të kryejë rol mbikëqyrës për mediat online dhe shtoi se Bashkimi Europian nxit vetërregullimin e medias si mënyrë për të luftuar dizinformimin apo lajmet false.

Duke folur pasditen e sotme në ceremoninë për shpërndarjen e Çmimeve të Bashkimit Europian për Gazetari Investigative në Shtëpinë e Europës në Tiranë, z.Soreca paralajmëroi se Komisioni Europian do të kundërshtojë paketën e ligjeve “anti-shpifje” të kryeministrit Edi Rama, duke argumentuar se projektligjet nuk respektojnë në tërësi standardet e BE-së për Lirinë e Fjalës.

“Kur bëhet fjalë për të luftuar dizinformimin, ndonëse ne kemi njësoj si autoritetet shqiptare shqetësime për sa i përket dizinformimit, komisioni rekomandon përqasje që janë më pak të ashpra, bazuar në një përqasje vetërregulluese. Kjo është përqasja që Komisioni Europian propozon në [dokumentin] Komunikimi në Trajtimin e Dizinformimit Online,” tha Soreca.

“Komisioni Europian ndan shqetësimet e organizatave të tjera ndërkombëtare në lidhje me mungesën e qartësisë ligjore dhe zgjerimin e funksioneve dhe kompetencave të Autoritetit të Medias Audiovizive për të përfshirë rregullimin e medias online – për shkak se kjo mund të sjellë efekte negative në lirinë e shprehjes”, – tha Soreca.

Në lidhje me projektligjet e propozuara nga qeveria e kryeministrit Edi Rama, Soreca tha se ndonëse disa shqetësime duket sikur janë trajtuar, draft-amendamentet nuk sigurojnë përputhje me standardet e BE-së për Lirinë e Shprehjes.

Kryeministri Edi Rama ka propozuar në Kuvendin e Shqipërisë një seri ndryshimesh në ligjin për median audiovizive si dhe në ligjin për komunikimet elektronike e postare, në të cilat parashikohet krijimi i një regjimi monitorimi dhe ndëshkimi të medias online në mënyrë jashtëgjyqësore.

Projektligjet janë kritikuar si një sulm kundër demokracisë në Shqipëri nga organizatat ndërkombëtare të të drejtave të njeriut si dhe nga organizatat shqiptare.

Projektligjet janë aktualisht në procedurë shqyrtimi parlamentar.