Partia “Zgjidhja”e Kokëdhimës: Europa të ndihmojë shqiptarët e braktisur nga qeveria

Partia “Zgjidhja” e drejtuar nga Koço Kokëdhima falënderon vendet europiane për gatishmërinë për të ndihmuar popullin shqiptar për të dëmtuarit nga tërmeti dhe uron që kjo ndihmë të materializohet. “Europa të mos harrojë se Shqipëria është pa qeveri, ndërsa kryeministri, pas mbaroi fushatën televizive me të dëmtuarit nga tërmeti, u nis në SHBA, për të siguruar një foto me presidentin amerikan”, thekson zgjidhja në deklaratë.

Deklaratë shtypi e partisë ‘Zgjidhja’

Presidenti i Parlamentit Evropian, David Sassoli, ofroi ndihmën e vendeve të bllokut për të dëmtuarit nga tërmeti që goditi Shqipërinë pasditen e së shtunës: “Mendimet tona janë me ata që janë lënduar ose kanë humbur shtëpitë e tyre. Europa është e gatshme të ndihmojë në rimëkëmbjen dhe rindërtimin”, shkruan Presidenti i PE.
Ndërkohë shumë vende si Italia, Greqia apo Kosova kanë ofruar ndihmë për Shqipërinë.
Partia ‘Zgjidhja’ falënderon vendet europiane për gatishmërinë për të ndihmuar popullin shqiptar dhe uron që kjo ndihmë të materializohet. Ato nuk duhet të presin qeverinë shqiptare, sepse ajo nuk ka as dëshirën dhe as vizionin për të ndihmuar njerëzit në nevojë.
Edhe pse janë dëmtuar mbi 500 banesa dhe mijëra banorë janë mes katër rrugëve, ajo nuk ka shpallur gjendjen e jashtëzakonshme për të mos lëvruar fondet qeveritare në ndihmë të popullsisë. Është mjaftuar duke i futur nëpër stadiume dhe çadra dhe bën show televiziv me riparimin e banesave të dëmtuara. Por të mos gënjehemi. Edhe në rastin e tërmetit që shkatërroi dhjetëra banesa në qarkun e Korçës, më 1 qershor, qeveria nuk lëvroi asnjë fond, por u mjaftua me thirrje solidariteti nga bashkitë dhe individët, ndërsa dhjetëra familje janë ende të pastreha dhe enden në qendra strehimi, apo çadra ushtrie.
Europa të mos harrojë se Shqipëria është pa qeveri, ndërsa kryeministri, pas mbaroi fushatën televizive me të dëmtuarit nga tërmeti, u nis në SHBA, për të siguruar një foto me presidentin amerikan. Ndaj, është emergjente ndihma e vendeve mike që shqiptarët e paqeverisur të mos ndihen të braktisur në këto ditë të vështira përballë fatkeqësisë natyrore. Atyre u ka rënë për hise të kenë një qeveri që mendon vetëm për xhepat e vet dhe të oligarkëve, por asnjë herë për ta.