Sadik Bejko: In memoriam, regjizorja Arzana Kraja!

Ka vdekur Arzana Kraja, regjisore, bija e shkrimtarit Mehmet Kraja, Kryetarit të Akademisë së Shkencave dhe të Arteve të Kosovës.

Kjo ngjarje është shumë e hidhur për botën e kinematografisë në Kosovë, botë ku Arzana Kraja ka kontribuar.

Është e hidhur dhe për rrethet e shkrimtarëve dhe të akademikëve të Kosovës, rrethe ku emri i Mehmet Krajës është një nga më të përmendurit, nga më të çmuarit.

Kjo ngjarje më prek dhe mua personalisht.

Si një i njohur i familjes Kraja, si bashkëpjesëmarrës dhe përcjellës me shkrimtarin dhe akademikun Mehmet Kraja i shumë veprimtarive kulturore në Tiranë Shkup, Prishtinë, Ulqin, si një nga lexuesit dhe vlerësuesit e veprimtarisë prej shkrimtari eseisti e veprimtari të Mehmet Krajës, unë sot ndjehem nën helmin zisë që i ka rënë në pjesë asaj familjeje. Familjes së mikut, kolegut tim.

Kjo është ngjarje e hidhur dhe për rrethet e krijuesve, të botueseve, të akademikëve e të publicistëve të Tiranës, rrethe ku Mehmet Kraja ka lënë gjurmë të pashlyera si krijues me integritet, si hartues veprash me cilësi të shënuara artistike

I shpreh ngushëllime familjes së Mehmet Krajës.

Arzana Kraja u prehtë në paqe dhe në mirësi.

Të bëjnë durim në zemër dhe në mendje ata që e rritën dhe e deshën Arzanën.

Të bëjnë kurajo për ta përqafuar çdo ditë jetën.

Kështu Arzana do të jetë e gjallë.

Sa kohë ata që e deshën, do të rrojnë dhe do ta kujtojnë atë, për aq kohë Arzana do të jetë e gjallë.