Frederik Reshpja: Partishmëria

Frederik Reshpja: Partishmëria

 

Nëpër porta e partive rrinë komunistët e

djeshëm

Më mësojnë mua kush është Marksi

Nëpër emblemat aty-këtu

Bronxi i Enverit shfaqet.

 

Komunistët e djeshëm me tituj

Të fituar në luftën e klasave

Më mësojnë mua ç’do me thënë disidencë

Më mësojnë mua ç’do me thënë prangat.

 

Komunistët e djeshëm, telefonat e djeshëm

Veturat e djeshme lyer me bojë

Kaloj para portave të partive i menduar

Me bukën e ditës në dorë.