David Lega i kërkon Ramës të tërhiqet nga ligji antishpifje

Paketa ligjore “anti-shpifje” e propozuar nga qeveria duket se vijon të jetë në shënjestër të kritikave nga faktorët ndërkombëtarë. Pas publikimit të raportit për lirinë e medias të Reporterëve Pa Kufij, ka reaguar edhe eurodeputeti David Lega i cili është anëtar i Komitetit për Punët e Jashtme për të Drejtat e Njeriut si dhe raportues për Shqipërinë. Ai thotë se me të drejtë Shqipëria ka rënë dy pozicione në indeksin e lirisë së medias për arsye të paketës ligjore të propozuar nga qeveria.

“Me të drejtë Shqipëria ka rënë dy pozicione në Indeksin e Lirisë së Medias të Reporterëve Pa Kufij për vitin 2020. Ligji për median do të përkeqësojë lirinë e shtypit në Shqipëri. Kufizimi i lirisë së shprehjes, informacionit dhe shtypit është i papranueshëm për një vend që aspiron Bashkimin Europian”, shkruan Lega në Twitter.

Kjo është hera e dytë që eurodeputeti Lega reagon lidhur me ligjin e medias. Nga ana tjetër qeveria ka vendosur ti drejtohet Komisionit të Venecias lidhur me këtë ligj pasi ai u kthye në Kuvend nga Presidenti Meta.