Ti që shpif nga divani, ti femër që shan gruan dhe ti burrë llafazan!

Ti që gjithmonë je i pari të vjellësh vrer mbi çdo gjë që bëjnë të tjerët a e ke pyetur veten, ti çfarë bën në jetën sociale që e kemi të përbashkët? Ti që reagon i pari në facebook me vërejtje, sharje apo fyerje, çfarë bën tjetër përvec se të nxjerrësh zorrët e barkut të lig me fjalë të ulëta? Apo tani facebook të duket nje kosh i madh ku të hedhesh ç’të duash mbi mundin e të tjerëve, sheh si punë, apo përfaqëson tinzarët e heshtur që nuk e prezantojnë inatin si ti. Ti zonjë apo zotëri si e bën punën tënde aty ku je? Si e jep kontributin tënd social? Shkruan ndonjë libër, bën ndonjë analizë ekonomike, familjare, kulturore, merr pjesë në ndonjë seminar me dëshirë që të vrasësh injorancën, je i pari në punën ku paguhesh?…

A lexon vazhdimisht libra, se nga shkrimet ke mangësi shpeshherë. Ti që citon thënie të figurave të mëdha letrare dhe as emrin nuk e përmend, vjedh dhe autorësinë. Ti që je në ndjekje të veprimtarive, mendimeve të të tjerëve, po veten tënde e ndjek ndokund? E kap ndonjëherë veten mat duke shpifur e baltosur pa masë të tjerët? Po në teatër shkon, kinema, opera? Po me gruan apo burrin flisni për librat, artin dhe psikologjinë, sportin, të ardhmen? Ti që je militant i çmendur, që çmendesh familjarisht me verbërinë në të cilën jeton e frymon.

Ti që nuk reagon kur rritet nafta, çmimet apo ikin njerëzit jashtë, por kur të ndryshon pushteti i partisë që ti dëshiron të ketë pozitë. Ti që mendon se çdo gjë është e thjeshtë për t’u bërë dhe vetë rri në krevatin e të gjithëve, facebook.

Ti zotëri, zonjë bën ndonjë gjë? Flet me fëmijët e tu të dashur, i shoqëron ata nëpër aktivitete sociale, u jep ndonjë shembull suksesi nga vetja? Ndonjë dëshmi vlere dhe miqësie? Ti që shpesh flet dhe s’të duket asgjë humanizmi, e ke provuar kënaqësinë e të qenurit human, të jesh qoftë dhe vullnetar apo vullnetare?

Ti që të gjitha politikanet i quan femra të ulëta e ke provuar ndonjëherë fushatën, pjesëmarrjen në konkurim, sfidat e femrës në karrierën politike?

Ti që merresh me trupin e zhveshjen e këngëtarëve, më thuaj çfarë muzike dëgjon, sa kultivim ke ti për muzikën, artin, kinematografinë? Ti që gjithmonë gjykon e paragjykon femrat e divorcuara, ke provuar të jesh kryefamiljare, të shkosh në punë me kokën pas për fëmijën, të jesh e vetme në sakrificë e vështirësi reale, ke jetuar me ndonjë burrë pijanec, të droguar, dembel apo kriminel?

Ti që do të bëhesh drejtor nga Facebook apo kafe e lagjes cila është fuqia e eksperiencës tënde, apo soditja nëpër thashetheme sesi u bënë të tjerët? Ti që shan çdo gazetar, e di ti se: lajmi, marketingu, tregu mediatik, njohuria mediatike janë sfida me të cilat përballesh çdo ditë? Ti që femrat me pushtet ekonomik i njollos, i quan edhe me emra të ulët, e di ti se edhe biznesmenët kanë fëmijë, gra dhe motra e jetojnë më mirë, por që edhe puna e përditshme, e vazhdueshme një ditë shpërblehet? Ti që merresh me udhëtimet e të tjerëve, po vetë kur ke mbërritur aty ku ke shkelur, apo asnjëherë se nuk mbërrihet pa njohur historinë dhe kulturën e një vendi. Apo udhëton nga divani, edhe për veshjen s’ke çarë të thuash se ti nuk del në media, podiume, në stadium apo në ceremoni të shumta. Në fakt nuk merren ata që janë pjesë e jetës sociale me ty, me komunikimin tënd, jetesën apo veshjen tënde, ti je më i zhveshuri se të mungon humanizmi, mendja dhe vizioni për më shumë.

Ti që numëron partnerët e komshijes, koleges dhe asaj që nuk e njeh fare, po ti e di se me kë fle e kë zgjohet motra jote, vajza jote, gruaja jote, burri yt? Ti që shan gjithë profesorët e di ti sa mëson fëmija yt, sa frekuenton fakultetin, sa orë rri me libra në duar? Ti që përgojon studentët që punojnë e kursejnë për shkollimin, që nuk di asgjë për ekonominë dhe rrethanat e tyre familjare pse shpif, apo kjo është puna jote? Ti pra, ti që gjithkund hedh fjalë, thua “hajt më” a më thua çfarë bën në jetën tënde? Apo jeton me një rrogë të burrit apo gruas, apo mes jush nuk funksionon kjo marrëdhënie dhe pakënaqësinë e përktheni në shpifje, mungesa e lumturisë prodhon inate, nuk të kursen as stresin dhe dhimbjen e kokës. Apo ju jetoni si militantë të partisë se familja juaj ështe e betuar politikisht, apo rastësisht keni një pronë të trashëguar. Kush punon fort nuk ka kohë të merret me askënd përveç vetes, nuk ka kohë me u shëtit nëpër jetën e tjetrit se koha i fluturon.

Ti grua që shan të gjitha femrat që bëjnë karrierë, para dhe sukses, vetë çfarë i jep shoqërisë, po vajzën tënde si e ushqen, apo me gjirin e idhët si fjalët? A ia lidhni këpucët fëmijëve në mëngjes, e puthni njëri-tjetrin kur dilni që të mos kaloni nga gjykata, luteni për njëri-tjetrin, e njihni veten dhe partnerët që keni në krah? Ju që u jepni mend beqarëve, po me martesat tuaja të çoroditura pse nuk merreni? Po për prindërit, a kujdeseni ju? Po plehrat i hidhni ku duhet, po pështymat i hidhni në rrugë?

Ju pra ju që shikoni çdo gjë të bota e madhe dhe asgjë tek bota e juaj, me thoni çfarë i jepni j komunitetit ku jetoni, familjes tuaj? Ah po, shpifni, nxisni debate dhe urrejtje, krijoni dhe strese me profile false në shumë raste, edhe kur lodheni flini pa ëndërra dhe zgjoheni për të krijuar rrëmuja të reja…