Cikël poetik nga Mimoza Erebara

Mimoza Erebara

KORRUPSION

Dha e mori

E dha e mori

Prej mijëra vitesh

Me këtë njerëzim primitiv

Nuk ia doli.

E,

në fund,

Zoti,

hapi kazino për engjëjt.

AKUAREL

Dhoma të ndyra

Vasale të përunjura

Të pisllëkut,

gjakrave,

mizave,

maceve e qenve fodullë

dhoma të mbushura

me shtrete-skelete

po aq të ndyrë

mbi shtrete-skelete

kocka të leckosura,

irnosura,

në rradhën e gjatë

ku jeta përpëlitet

dhunshëm,

trishtueshëm,

ndër duar xhahili

të mbushura me gjak,

të mbushura me para

që rrjedhin,

si gjaku i pakët,

i zbërdhylët,

prej trupit të mpakttë

prej trupit të drobitur.

PRAPANICË QENI E NDRIÇUAR

Dielli,

kur ndriçon

ndriçon për të gjithë

dhe kurrë nuk e di

kë përkëdhel

si sot,

që në prapanicën e një qeni

rrezja i mbeti!…

04.11.2008.

LULËZIM

…edhe kallami lulëzon

…në kënetë…

KUFIJTË

Pshurrin kafshët

Dhe territorin caktojnë,

Presidentët

Me gotat e uiskit në duar

Kufijtë ndajnë,

Fatet e kombeve,

Globit vetë.

EKUINOKS

Kur,

Universi cakton kufijtë e Ekzistencës,

Dhe,

Ekzistenca i cakton kufij Vetvetes,

Aty, unë sillem, pa e gjetur

Kufirin tim

Kësaj vije torturuese në mendje!

Please follow and like us: