Ismail Xhaferi: Poetët…

 

Fat të madh atdheu pati,

me poetë i qeshi fati,

keni parë a s’keni parë,

çdo pëllëmbë e një shkrimtar?!

 

Nuk merret njeri me punë,

vetëm fjalë që derdhen lumë,

poezi edhe ninulla,

më shumë libra, se sa tulla.

 

S’di për cilin të rrëfej,

nga poetët e mëdhenj

si u bë kjo botë e shkretë,

ku të gjithë quhen poetë?!

 

Dijeni se nuk gënjej,

janë poetë të mëdhenj,

meqënse s’kanë punë tjetër,

harxhojnë laps edhe letër.

 

Fat të madh kemi vërtetë,

se u gdhimë të gjithë poetë,

të gjithë me lapsa në duar,

mbetën tokat pa punuar.

 

Fat të madh atdheu pati,

me poetë i qeshi fati,

veçse sitën po lëkunde,

ka pak miell e shumë krunde…