Materiale ekskluzive/Si u thërmua kallaji opozitar me ndryshimet kushtetuese me 30 korrik 2020

Kuvendi i Shqipërisë miratoi në seancën e fundit të sesionit parlamentar ndryshimet kushtetuese që lidhen me procesin e reformës zgjedhore, duke vendosur përfshirjen e listave të hapura për zgjedhjet parlamentare. Në Kuvend u miratua me 106 vota pro dhe 10 kundër marrëveshja e arritur mes maxhorancës së drejtuar nga partia në pushtet, Partia Socialiste e Shqipërisë, dhe deputetëve të opozitës parlamentare, për të ndryshuar nenin 64 dhe 68 të Kushtetutës së Republikës së Shqipërisë. Kuvendi i Shqipërisë aktualisht ka 122 deputetë, pas dorëzimit vitin e kaluar të mandateve nga partitë opozitare, Partia Demokratike e Shqipërisë dhe Lëvizja Socialiste për Integrim, ndërsa Kushtetuta përcakton se Kuvendi i Shqipërisë përbëhet nga 140 deputetë. Sipas ndryshimeve, në zgjedhjet e radhës parlamentare do të aplikohet sistemi i votimit me lista të hapura ku votuesve u jepet mundësia të zgjedhin partinë dhe kandidatin, ndërsa detajet për këtë sistem dhe pragun elektoral do të përcaktohen në Kodin Zgjedhor të Shqipërisë. Në fjalën e tij në seancë, Kryeministri i Shqipërisë, Edi Rama, tha kjo votë është me dinjitet dhe tërësisht në përputhje me standardet ndërkombëtare dhe sipas tij me ambicien për ta bërë Shqipërinë një vend më demokratik. “Sot pavarësisht se shumëçka ne na ndan, vota e përbashkët është në fakt të qenit së bashku në anën e duhur të historisë, të zhvillimit demokratik dhe të përsosjes së pluralizmit dhe në anën e duhur të popullit shqiptar, të zgjedhësve shqiptarë të cilëve ne u japim mundësinë të zgjedhin jo vetëm partinë, por edhe deputetin që duan”, tha Rama. Ndërsa deputeti Korab Lita, nga opozita parlamentare tha se procedura e ndryshimit të Kushtetutës për hapjen e listave ka kaluar të gjithë praktikën ligjore në komisionet parlamentare, grupet e interesit dhe ekspertët konstitucionalistë. Me seancën që miratoi ndryshimet kushtetuese, Kuvendi i Shqipërisë mbylli sesionin e gjashtë të legjislaturës së nëntë, ndërkohë sesioni i shtatë do t’i nisë punimet në shtator 2020.

LIGJ, Nr. 115/2020 PËR DISA NDRYSHIME NË LIGJIN NR. 8417, DATË 21.10.1998, “KUSHTETUTA E REPUBLIKËS SË SHQIPËRISË”, TË NDRYSHUAR

Në mbështetje të neneve 83, pika 1, dhe 177, pika 1, të Kushtetutës, me propozimin e një të pestës së anëtarëve të Kuvendit,

K U V E N D I I REPUBLIKËS SË SHQIPËRISË V E N D O S I:

Në ligjin nr. 8417, datë 21.10.1998, “Kushtetuta e Republikës së Shqipërisë”, të ndryshuar, bëhen këto ndryshime:

Neni 1

Neni 64 ndryshohet si më poshtë:

“Neni 64

Kuvendi përbëhet nga 140 deputetë, të zgjedhur sipas një sistemi zgjedhjesh proporcional me konkurrim rajonal dhe prag kombëtar.
Në shpërndarjen e mandateve marrin pjesë subjektet zgjedhore që arrijnë pragun kombëtar.
Zgjedhësit gëzojnë të drejtën për të dhënë votë parapëlqyese për kandidatët e listave shumemërore. Kriteret dhe rregullat për zbatimin e sistemit zgjedhor, për caktimin e zonave zgjedhore, pragun kombëtar, numrin e mandateve për secilën zonë, shpërndarjen e mandateve dhe masën e shtrirjes së votimit parapëlqyes përcaktohen në ligjin për zgjedhjet. Ligji për zgjedhjet garanton që votimit parapëlqyes t’i nënshtrohen jo më pak se dy të tretat e listës shumemërore dhe të sigurojë përfaqësim gjinor”.

Neni 2

Pika 1 e nenit 68 ndryshohet si më poshtë:

“1. Kandidatët për deputetë paraqiten në nivel zone zgjedhore nga partitë politike ose nga zgjedhësit. Një kandidat mund të paraqitet vetëm për një nga subjektet propozuese, sipas kësaj pike. Rregullat për regjistrimin e kandidatëve për deputetë përcaktohen në ligjin për zgjedhjet.”.

Neni 3

Hyrja në fuqi

Ky ligj hyn në fuqi 15 ditë pas botimit në Fletoren Zyrtare.

KRYETARI: Gramoz RUÇI

Miratuar në datën 30.7.2020

Please follow and like us: