Xhoi Jakaj: Mbi abuzimin dhe bullizimin televiziv e politik që vret…

Abuzimi dhe Bullizimi televiziv e politik po vret kulturën e të dëgjuarit dhe fjalës së urtë e të vërtetë!

Ka nisur prej ditësh fyerja, poshtërimi dhe bullizmi mes politikanëve, por rëndon ata, apo popullin e thjeshtë, sigurisht kjo e fundit i vuan pasojat sepse ata edhe kur bullizojnë njëri- tjetrin kanë një qëllim pas kuintave. Një as nën mënge e ruajnë gjithnjë.

A ngjajnë bullizmi politik me atë në televizione, apo janë në shërbim të dhunës të dyja kohët e fundit?

Bullizmi është një dhunë psikologjike ose fizike e ushtruar vazhdimisht nga një grup individësh kundrejt një individi tjetër ose një person i vetëm bullizon vazhdimisht. Kolegët, ortakët, gazetarët, partnerët me shprehjet ti nuk di ‘asgjë’ ti je ‘kazan’, por fitimet e plehrava i përfitoj unë pa kazanin. Ti je i paditur. I korruptuar, i ke bërë dëm vendit,  etj, etj…

Dhuna është një shkelje e të drejtave të njeriut që shoqërohet me probleme shëndeti, por kur ai është në nivele shtetërore shkakton edhe dëme ekonomike dhe ajo kultivohet nga lart poshtë në mënyrë sistematike.

Asnjë shtet nuk mund të arrijë një edukim cilësor, të fëmijëve, adoleshentëve ose të rinjve në një rrafsh gjithëpërfshirës dhe të barabartë, nëse kryetarët e shtetit, të opozitës dhe pushtetit vendor e zhvillojnë dhunën në mënyrë të përhershme në televizion dhe rrjete sociale.

Bullizmi dhe abuzimi ngjajnë shumë e  janë të përhapura tej normave të lejuara shoqërore vitet e fundit, nuk dëgjon te asnjë politikan projekte për të papunët, të varfërit, hapjen e vedneve të punës, zhvillimin e projekteve arsimore, kulturore apo sportive për të rinjtë që t’i largohen dhunës, duhanit, drogës e ikjeve masive nga vendi.

Por në çdo dalje televizive bullizojnë njëri- tjetrin me termat: Hajdut, kastravec, shalqi me provë ose pa provë.

Kujdesi duhet të fillojë që në kopësht, të shtrihet në shkollat fillore dhe ato 9-vjeçare me një program të detajuar me projekte nga shoqatat ose shteti me një grup profesionistësh, sepse parandalimi është më i lehtë se shërimi e jo të shtrihet në të gjitha sferat e shoqërisë, kryesisht nga kupola shtetërore kur në thelb ata duhet të iniciojnë projekte kundër dhunës e të bullizuarit në grup e jo zhvillimi i saj të marrë udhë pikërisht nga vetë ata?!

Bullizmi është një dëshirë për të dëmtuar tjetrin, dëshirë që personit i jep krenari, një veprim që lëndon, një disbalancë në forcë, një përdorim i padrejtë i forcës, kënaqësi e dukshme e agresorit si dhe një ndjenjë e përgjithshme e të qënit mbizotërus ndaj viktimës… A nuk e keni parë shumë shpesh te Politika e politikanët tanë këto kohë, a nuk e kemi parë çdo natë në studiot televizive agresionin e hapur nē emër të të berit debat televiziv, por ajo nuk është gjë tjetër veçse një bullizëm i hapur ku i madh e i vogël i mëshiron ata analistë, por në fakt edhe ndiqen si modele.

‘Bullying’ i shqipëruar do të thotë “kërcënim” dhe tregon fenomenin e sjelljeve të përsëritura, agresive, të dhunshme me karakter psikologjik, fizik, që iu bëhet fëmijëve, adoleshentëve të pambrojtur e të vetmuar, por nuk përjashtohen as të rriturit që bullohen ose i bullojnë të tjerët, si psh një individ ose grup individësh më të mëdhenj të cilët kërkojnë të diskriminojnë, keqtrajtojnë apo abuzojnë.

Këtë nocion e kemi dëgjuar shpesh në shkolla, por sot mbizotëron pothuajse në shumë emisione televizive dhe jetën politike shqiptare; a nuk keni parë formate ku ka degjenerim të vlerave, në emër të ‘lirisë së shprehjes’, a nuk shohim thyerje pjatash dhe bullizëm me termat: qorre, debile, i paaftë, mediokër, tutkun…

Këta individë  agresivë kryejnë bullizëm ndaj ‘viktimave’ të tyre duke  shfrytëzuar formatin ose edhe një panel në një studio televizive, luajnë me pamjen e jashtme, statusin social, përkatësitë racore ose dhe atë  fetare.

Bullizmi shfaqet me karaktere dhe me forma të ndryshme:

1. Bullizmi Fizik: Abuzim me anë të dhunës së përsëritur të çdo forme!

2. Bullizmi Psikologjik Verbal: Me anë të fyerjes, nofkave, thashethemeve dashakeqe, shpifjeve…

3. Bullizmi Social: Ky në rrjetet sociale ka arritur kulmin e tij, me fyrje kryesisht me adresa false dhe tituj bombastikë në emër të klikimeve e fitimeve në kurriz të të tjerëve duke i bullizuar dhe fyer ata ose ato!

4. Bullizmi Seksual, që është verbal me anë të fjalëve fyese, provokuese, por edhe fizike me ngacmime seksuale.

5. Bullizmi Virtual, me anë të rrjeteve nga keqpërdorimi i tyre për të dëmtuar ‘viktimën’ me postimin e fakteve videove të bëra në momente dobësie ose nën dhunë, apo thjesht shpifjeve publike.

6. 6-Bullizmi Racial, nëpërmjet fyerjes dhe dhunës ndaj racës.

7. Bullizmi Fetar, duke diskriminuar dhe fyer fenë apo duke e përdorur pafund një person në emër të fesë deri në vetflijim të personit apo kthimin e tij ne kamikaz.

8. Bullizmi Krahinor dhe fyrje e nofka në emër të krahinës nga vjen.

9. Bullizmi Televiziv: Prej disa vitesh në emër të audiencës është shtuar ndjeshëm dhe dukshëm bullizmi në shumë emisione apo formate sezonale në emër të rritjes së kurbës së shikueshmërisë; janë gati të ftojnë sherrxhinj, persona pa vlera individuale, vetëm për audiencë e këtë gjë e justifikojnë më faktin se e kërkon publiku. Po a nuk është detyrë e juaja të edukoni e jo të çedukoni…?!

10.  Bullizmi Politik: Ky bullizëm për momentin ka ç’orientuar gjithë shoqërinë, e cila për shumë arsye ka një hutim dhe nuk di fare se çfarë të zgjedhë për jetën e tij, e të familjes sepse ndër vite nuk gjen modele të mira që t’u besojë, zhgenjimi që kemi pësuar ka pasoja në jetën e secilit prej nesh.

Në mbyllje ju drejtohem me një thirrje Politikës dhe Televizioneve Shqiptare, që ulni dozën e dhunës e të bullizimit, pasi po dëmtoni shendetin mendor dhe fizik të gjithë brezave në këtë vend, nëse ata nuk dëgjojnë kam një thirrje për shikuesin dhe votuesin: Ndëshkoi me injorim dhe votim sepse e ardhmja e fëmijëve tuaj ka shumë më tepër rëndësi se politika e çdo lloj partie.