Popullore nga Çamëria: Dolla ditën e Shëmitrit…

Dolla ditën e Shëmitrit:

në divan të Arvanitit,

pashë një radhë me vajza.

Njera qe thëllëzë mali,

që më doq, si djek behari,

theretiu e allonari.

Atë thëllëzë manare,

dua që ta kern për fare,

t’i bij jelek me çapare.

Çapare të sgetullës,

të keqen e vetullës,

dhe të sive që shajtojnë!

Pa dil pak, o moj shqiponjë,

të potisç vasilikonë!

Tej penxheres përmbi udhë,

piva dhe s’u ngopa ujë!

Ç’t’u them sot u fukaraja?

Po më djek, shokë, sevdaja,

brenda, mu në funt të shpirtit,

për vajzën e Arvanitit,

q’atë ditën e shëmitrit.

Gravë – Gumenicë

(Këngë Popullore nga Çamëria)

Në foto: arvanitsja Irini Lelekou/ Irene Papas me kostumin e vajzës arvanitase.