Laura Skënderas: Jemi të huaj…

Ne jemi të njohur bulevardit,

asgjë më shumë, asgjë më pak.

Paçka se ti je dielli im,

e unë Hëna që i vjen qark.

Ne jemi miq në udhë të gjata,

asgjë më shumë e as më pak.

Tetoreve ndodh të ndajmë një çadër

edhe një stol parkut vjeshtak.

Ne jemi dy në ditë të ftohta,

kur perëndimi qiellin përflak.

Një përqafim dhe njëmijë puthje,

asgjë më shumë, asgjë më pak.