Ruben Avxhiu: Imami shqiptaro-amerikan Dr. Tahir Kukaj që meriton respektin dhe nderimin tonë më të lartë

Imami i njohur shqiptaro-amerikan Dr. Tahir Kukaj dhe Qendra Kulturore Islamike Shqiptare janë nderuar me një deklaratë mirënjohje në emër të Senatit të New York-ut, me nismën e Senatorit të Shtetit, Andrew Lanza.
Senatori Lanza, i cilia ia ka dorëzuar personalisht dokumentet zyrtare klerikut të komunitetit tonë, ka vlerësuar lart punën e tij në shërbim të komunitetit dhe të shtetit të New York-ut, sidomos në periudhën gjatë pandemisë.
Qendra Kulturore Islamike Shqiptare ka një veprimtari të gjerë në Staten Island (ishulli në jug të Manhattan-it dhe një prej pesë ndarjeve të mëdha administrative në Qytetin e New York-ut).
Në veçanti çmohet puna e imamit shqiptar në ndërtimin e urave ndërfetare mes komuniteteve të ndryshme në Staten Island dhe më tej në Qytetin tonë.
Imami Kukaj ka qenë në vijën e parë të frontit për të ndihmuar nevojtarët në kushtet e rënda të pandemisë. Ai ka ndihmuar në shpërndarjen e mijëra maskave, dizinfektuesit të duarve, ushqime dhe mjete të tjera të nevojshme shtëpiake për të vobektit.
Si kapelan i Departamentit të Policisë së New York-ut, Dr. Kukaj ka ndihmuar në edukimin e forcave të rendit për të njohur dhe respektuar më mirë kulturën e komunitetit shqiptar, komunitetit mysliman, popullsinë e larmishme në Staten Island, etj.
Ai shërbeu nga 2015 në 2019 si Anëtar i Komitetit Këshillimor të Bashkisë si dhe shërben në shumë kapacitete përfshi edhe në Grupin Këshillues për Myslimanët të FBI-së, Grupin Këshillues të Klerit Ndërfetar në New York etj.
Imam Kukaj është nderuar në vite nga shumë figura të njohura të politikës dhe zyrtarë të lartë amerikanë dhe njujorkezë. Revista e njohur “City & State” e ka përfshirë për të dytin vit në listën e 100 figurave më të fuqishme në Staten Island.
Pikërisht për këtë “altruizëm dhe vetmohim” të treguar në shërbim të komunitetit të tij që Senatori i Shtetit Andrew Lanza në emër të Senatit të New York-ut e ka nderuar si “një individ që meriton respektin dhe nderimin më të lartë”.