Merkel: E hapur për pranimin e kontrolluar të refugjatëve afganë

Kancelarja gjermane, Angela Merkel u shpreh sot se ishte e hapur për një pritje “të kontrolluar” të refugjatëve afganë, “veçanërisht të cënueshëm”, që largohen nga regjimi taleban, ndërsa pranoi vështirësinë për të gjetur një marrëveshje për këtë çështje midis partnerëve evropianë. Megjithatë, Merkel, vendi i së cilës priti më shumë se një milion azilkërkues në 2015 dhe 2016, shpjegoi se duhen kërkuar fillimisht zgjidhje rajonale, për t’i pritur këta refugjatë në vendet fqinje të Afganistanit. “Së dyti, ne mund të reflektojmë nëse njerëzit veçanërisht të cënueshëm duhet të vijnë në Evropë (…) në mënyrë të kontrolluar dhe me mbështetje”, tha ajo në një konferencë shtypi… Udhëheqësja konservatore ka planifikuar të takohet me Komisionerin e Lartë të Kombeve të Bashkuara për Refugjatët, Filippo Grandi, për këtë qëllim. Që kur talebanët morën pushtetin të dielën, mijëra afganë janë dyndur në aeroportin e Kabulit në përpjekje për të lënë vendin e tyre, duke shkaktuar skena shqetësimi në të gjithë botën. Rreth 2 000 persona, sipas policisë, demonstruan të martën pasdite në Berlin në favor të pritjes “së shpejtë” të refugjatëve afganë në Gjermani.