Odise Kote: KURBATKA

Lumi gjarpër, syri flakë,

brengë zhur, plasur së qari.

Fjongokuqja, def i çarë,

ngre të vdekurin nga varri.

Këmbëzbathur n’atë breg,

lumi gjarpër, syri flakë.

Dielli shtang e shelgu qesh,

herë në muzg e herë në ag.

Thupër shiu bëhet hark,

çan e shkrif një shkretëtirë.

Lumi gjarpër, syri flakë,

belin – bel si fluturidhë.

Tinguj zjarri kjo muzikë,

shpres’ a djall që plas në gjak.

Gjinj’ lëvduar, krejt pa frikë,

lumi gjarpër, syri flakë.

Përvëlim që djeg e pjek,

buzë shegë, trupin saç.

Lumin, po deshe ta shes,

shpirtin kurrë nuk ta jap …!

Vëllimi PENGJE TË GURËVE, 2021