Kongresi i IUCN-së mbyllet me thirrjen për rimëkëmbje pas pandemisë të mbështetur në natyrë 

Kongresi Botëror për Ruajtjen i IUCN-së përmbylli punimet më 10 shtator në Marsejë dhe online, duke përcaktuar agjendën për ruajtjen e natyrës në dhjetëvjeçarin e ardhshëm dhe përtej. Kongresi i IUCN-së shërbeu si nxitje për qeveritë në zbatimin e planeve për rimëkëmbjen nga pandemia të mbështetura në natyrë, duke investuar të paktën 10% të fondeve për rimëkëmbjen e mbështetur në natyrë, dhe miratimin e një sërë rezolutave dhe angazhimeve për të adresuar krizat e ndërlidhura të  klimës dhe biodiversitetit.

“Kongresi i IUCN-së vepron si një parlament unik, mjedisor, gjithëpërfshirës, global, ku qeveritë, OJQ-të dhe Popujt Autoktonë shprehin të gjithë mendimin e tyre. Vendimet e marra këtu në Marsejë do të nxisin veprimin për të trajtuar krizat e biodiversitetit dhe klimës në dhjetëvjeçarët e rëndësishëm që do të vijnë. Anëtarët e IUCN-së së bashku po i dërgojnë një mesazh të fuqishëm Glasgow-t dhe Kunming-ut: koha për ndryshimin thelbësor është tani,” u shpreh Dr Bruno Oberle, Drejtori i Përgjithshëm i IUCN-së.

Rezolutat e miratuara në mënyrë demokratike nga Anëtarët e IUCN-së përfshijnë thirrjen për mbrojtjen e 80% të Amazonës deri në vitin 2025, ndalimin e gërmimit minerar në thellësi të oqeaneve, dhe miratimin e një qasjeje ambicioze të Vetme për Shëndetin nga komuniteti global. Pjesëmarrja aktive e Anëtarëve të Organizatës së Popujve Autoktonë në procesin demokratik të IUCN-së bëri që shumë rezoluta të përqendroheshin në të drejtat dhe rolin e popujve autoktonë për ruajtjen.

Në total, më shumë se 1,500 Anëtarë të IUCN-së miratuan 148 rezoluta dhe rekomandime, 39 përmes votimit të drejtpërdrejtë në Kongresin e IUCN-së në Marsejë, dhe 109 përmes votimit online përpara takimit. Ndër vendimet e marra në Marsejë ishte rezoluta për krijimin e Komisionit për Krizën Klimatike nga IUCN-ja, për të plotësuar gjashtë Komisionet ekzistuese të Unionit.

Në seancën përmbyllëse të Kongresit të IUCN-së, shteti i Unionit, Anëtarët e organizatave joqeveritare dhe të Popujve Autoktonë miratuan Manifeston e Marsejës, duke përfshirë angazhimin për zbatimin e Agjendës së parë të vetë-përcaktuar Autoktone Globale të IUCN-së.

Angazhimet e shpallura nga aktorët shtetërorë dhe jo shtetërorë në Kongresin e IUCN-së përfshijnë:

• Angazhimin e Francës për të arritur 30% të mbulimit me zona të mbrojtura në rang kombëtar deri në vitin 2022, dhe 5% të sipërfaqes së saj detare mesdhetare me mbrojtje të rreptë deri në vitin 2027;
• Mbi 30 qeveri ndërshtetërore, qytete, organizata partnere si dhe IUCN-ja, ranë dakord të zgjerojnë në nivelin universal aksesin për hapësira të gjelbra të cilësisë së lartë dhe të rrisin biodiversitetin urban në 100 qytete, duke përfaqësuar rreth 100 milionë qytetarë deri në vitin 2025, dhe duke vlerësuar ndikimin e tyre në bazë të Indeksit Urban të Biodivesitetit;
• Nën drejtimin e shteteve Perëndimore të Oqeanit Indian, IUCN-ja dhe partnerët u angazhuan të mbështesin Iniciativën e Murit të Madh të Kaltër, rrjeti i parë rajonal i lidhur për të

zhvilluar ekonomitë e rigjeneruara blu në dobi të 70 milionë njerëzve, ndërkohë që ruhet dhe restaurohet biodiversiteti detar dhe bregdetar.

Zyra Rajonale për Evropën Lindore dhe Azinë Qendrore e IUCN-së (ECARO) organizoi një numër takimesh në vendtakim dhe virtualisht duke përfshirë një panel të nivelit të lartë për Zgjidhjet e Mbështetura tek Natyra në Ballkanin Perëndimor dhe një seancë në kampus të ndërmjetësuar nga WCPA për ruajtjen ndërkufitare.

“Si pjesë e panelit të nivelit të lartë ministeror, ne diskutuam për lidhjen mes klimës dhe natyrës dhe potencialin e shkallëzimit të Zgjidhjeve të Mbështetura tek Natyra (ZMN) në Ballkanin Perëndimor  në mbështetje të përpjekjeve rajonale për përshtatjen ndaj ndryshimeve klimatike. Ne synojmë  të ndërtojmë një partneritetit të gjerë me qeveritë, organizatat e qeverisë civile, bizneset dhe komunitetet lokale për të trajtuar një nga sfidat më të ngutshme me të cilat përballet rajonit sot,” u shpreh Boris Erg, Drejtori i IUCN ECARO. “Rezultati i shkëlqyer dhe diskutimet e gjalla në takim të përqendruara në Rripin e Gjelbër Europian – rrjeti më i gjatë i gjelbër në Evropë, ripohuan lidhjen e ruajtjes ndërkufitare me infrastrukturën e gjelbër në Evropë të shprehura në politika koherente, objektiva ambicioze afatmesme dhe financim të duhur,” shtoi ai.

Anëtarët gjithashtu miratuan një program të ri për IUCN-në për katër vitet e ardhshme dhe zgjodhën kryesinë e re të IUCN-së, duke përfshirë Presidentin e ri të Unionit, Razan Al Mubarak.

Me pothuajse 6,000 pjesëmarrës të regjistruar në vendtakim dhe më shumë se 3,500 pjesëmarrës online, ky takim hibrid solli së bashku drejtuesit qeveritarë, shoqërinë civile, komunitetet autoktone, besimtare dhe shpirtërore, sektorin privat, dhe akademikët, për të vendosur së bashku për veprimet e adresimit të sfidave më të ngutshme të ruajtjes dhe zhvillimit të qëndrueshëm. Mbi 25,000 anëtarë të publikut të gjerë vizituan gjithashtu Ekspozitën dhe Espaces Generations Nature.

Kongresi i IUCN-së u përqendrua në tre tematika kryesore: kornizën për ruajtjen e biodiversitetit pas vitit 2020, që do të miratohet nga palët e Konventës së Kombeve të Bashkuara për Biodiversitetin; rolin e natyrës në rimëkëmbjen globale nga pandemia e COVID-19; dhe nevojën për të transformuar sistemin financiar global dhe investimet e drejtpërdrejta në projekte të cilat janë në dobi të natyrës.