Ndahet nga jeta regjizorja Burbuqe Berisha

Ish-drejtoresha vdiq në zyrë, ministri i Kulturës tregon pse ndodhej në ministri. Ministri i Kulturës, Hajrulla Çeku, ka shprehur ngushëllime për vdekjen e regjisores Burbuqe Berisha. Përmes një postimi në Facebook, Çeku ka treguar se Berisha frymën e fundit e dha në Ministrinë e Kulturës. “Lajm i trishtë. Burbuqe Berisha iku para kohe. La pas një krijimtari të pasur filmike e teatrore. Ishte personalitet i veçantë i kulturës. Frymën e fundit e dha në Ministrinë e Kulturës. Kishte ardhur për punët përgatitore të koncertit të Operës, po e bënte regjinë e koncertit. Ngushëllime familjes, komunitetit artistik dhe gjithë shoqërisë. Qoftë i përjetshëm kujtimi për jetën dhe veprën e Buqes”, ka shkruar ai.

Kush ishte regjisorja Berisha?

Studimet themelore dhe master i ka përfunduar në Fakultetin e Arteve, dega Regji e Filmit në Universitetin e Prishtinës “Hasan Prishtina”, në Prishtinë. Ka krijuar një numër të konsiderueshëm të filmave me metrazh të shkurtër dhe te gjatë si dhe dokumentarë, seriale  televizive, shfaqje teatrore dhe është fituese e disa shpërblimeve në festivale të filmit dhe teatrit me karakter ndërkombëtar  dhe ne vitin 2019 është fituese e çmimit kombëtar për kinematografi. Për një vit e gjysmë ka punuar si menaxhere në Kino ABC në Prishtinë, për katër vite si producentë në Kosova -Film, po ashtu për katër vite me radhë si drejtoreshë e Përgjithshme e Teatrit Kombëtar të Kosovës dhe anëtare e Këshillit Drejtues të QKK-së, si dhe të Ansamblit “Shota” në vitin 2017 kryetarë e këshillit drejtues te TKK. Në shumë festivale filmash ka qenë anëtare e jurive profesionale me karakter ndërkombëtar dhe është aktiviste e shumë fushatave humanitare. Ne vitin 2020 është e nominuar nga  Theatre Award Program 2020 ne LPTW Gilder/Coigney International Theatre. Aktualisht ishte pro-dekane në Fakultetin e Komunikimit Masiv dhe Gazetarisë në Kolegjin AAB dhe drejtoreshë artistike e festivalit ‘Prishtina Internacional Theater’.