ESCOBAR PARA VIZITËS NË SHQIPËRI: MBËSHTESIM “BALLKANIN E HAPUR”

Në prag të vizitës së parë zyrtare në Tiranë, i dërguari amerikan për Ballkanin Perëndimor, Gabriel Escobar ka shprehur besimin se Shqipëria me shumë mundësi do të bëhet në të ardhmen anëtare e Bashkimit Evropian.

“Kur shikon rajonin në tërësi administratat fiskale në Shqipëri dhe Maqedoninë e Veriut i bëjnë ato unike dhe kështu kualifikohen për anëtarësim në BE. Ne jemi dëshmitarë të rritjes ekonomike fenomenale në Ballkanin Perëndimor. Me integrimin evropian dhe të gjitha proceset e lidhura ekonomike në rajon do të ketë një burim rritjeje dhe zhvillimi për Evropën. Integrimi i shpejte i këtij rajoni do të jetë një burim rajonal për sektorin e energjisë, transportit, sektorit të IT, teknologjisë dhe duke pasur parasysh qendrat e mëdha universitare”.

I pyetur për faktin faktin se ka rezistencë ndaj projektit “Ballkani i Hapur” në Bosnje Hercegovinë, Kosovë dhe Mal të Zi, që nënkupton krijimin e një tregu të përbashkët dhe zonës ekonomike mes vendeve të rajonit, Escobar theksoi se Shtetet e Bashkuara e mbështesin këtë iniciativë.

“Ne mbështesim çdo përpjekje për integrimin ekonomik rajonal, Procesin e Berlinit, Tregun e Përbashkët Rajonal, CEFTen dhe Ballkanin e Hapur. Për sa kohë që është e hapur për të gjitha vendet, për sa kohë që ofron sisteme ligjore dhe rregullatore dhe i ngre ato në nivel evropian, për sa kohë që promovon drejtësinë, tregtinë e hapur, ne do t’i mbështesim këto parime”.

I dërguari amerikan për rajonin thekson se integrimit ekonomik duhet t’i paraprijë krijimi i institucioneve të forta ndërsa administrata e re amerikane është e fokusuar në radhë të parë në problemin e korrupsionit.

“Nuk mund të kesh iniciativë për kufijtë e hapur nëse nuk ke rregullore të përshtatshme për hyrjen e njerëzve, kundër pastrimit të parave, kundër kontrabandës etj. Në fund të fundit, ekonomitë e kësaj zone nuk mund të funksionojnë nëse keni një treg prej 600,000 në Mal të Zi ose 2 milionë në Maqedoninë e Veriut. Ju duhet një treg nga 20 milionë që të gjithë të marrin pjesë në të. Kjo është baza mbi të cilën ne kushtëzojmë mbështetjen tonë për “Ballkanin e Hapur”.

Escobar ka vënë në dukje se në ditët në vijim edhe politika e re amerikane e sanksioneve ndaj individëve të korruptuar do të zgjerohet.