Princi Charles: Mbretëresha Elizabeth II, 70 vite arritje të jashtëzakonshme

Princi i Uellsit ka nderuar mbretëreshën Elizabeth II në jubileun e saj të platintë për arritje të jashtëzakonshme, sipas BBC.

Princi Charles mirëpriti dëshirën e nënës së tij që Camilla, Dukesha e Cornwallit, të njihet si Queen Consort kur ai të bëhet mbret.

Ai tha se ai dhe bashkëshortja ishin “thellësisht të ndërgjegjshëm për nderin”.

Mbretëresha është monarkja e parë britanike që feston një Jubile Platini.

Në një mesazh për 70-vjetorin e mbretërimit të saj, ajo tha se ishte “dëshira e saj e sinqertë” që Camilla të kishte këtë titull.

Princi Charles tha në një deklaratë se “përkushtimi i mbretëreshës për mirëqenien e të gjithë popullit të saj frymëzon admirim edhe më të madh çdo vit që kalon”.

“Ne jemi thellësisht të ndërgjegjshëm për nderin e përfaqësuar nga dëshira e nënës sime. Ndërsa ne kemi kërkuar së bashku t’i shërbejmë dhe të mbështesim madhërinë e saj dhe njerëzit, bashkëshortja ime e dashur ka qenë mbështetja ime e palëkundur gjatë gjithë kohës”.

Mbretërimi i Elizabeth II filloi kur ajo ishte 25 vjeç, pas vdekjes së babait të saj, George VI, më 6 shkurt 1952.

“Dëshiroj t’ju falënderoj të gjithëve për mbështetjen tuaj. Unë mbetem përjetësisht mirënjohëse dhe e përulur për besnikërinë dhe dashurinë që vazhdoni të më jepni”, tha monarkja në një mesazh.

Jubileu është i pari i monarkes pa Dukën e Edinburgut, bashkëshortin e saj prej 73 vitesh, i cili vdiq vitin e kaluar./ata.gov.al