Aktori amerikan shkon në Kiev për të filmuar pushtimin rus

Aktori dhe regjisori amerikan Sean Penn është në Kiev duke bërë një dokumentar për pushtimin e Rusisë, tha të enjten zyra e presidentit ukrainas.
Fituesi i dy çmimeve Oskar u fotografua duke marrë pjesë në një konferencë shtypi të qeverisë në Kiev. Ai ka zhvilluar edhe një takim me Volodymyr Zelensky, gjë që u pasqyrua në një video të postuar në llogarinë zyrtare në Instagram të presidentit ukrainas.

“Regjisori erdhi në Kiev posaçërisht për të regjistruar të gjitha ngjarjet që po ndodhin në Ukrainë dhe për t’i treguar botës të vërtetën për pushtimin e vendit tonë nga Rusia”, thuhet në një postim në gjuhën ukrainase në faqen e zyrës presidenciale në Facebook.

“Sot, Sean Penn është ndër ata që mbështesin Ukrainën, duke qëndruar këtu. Vendi ynë i është mirënjohës atij për një shfaqje të tillë guximi dhe ndershmërie”. Postimi shtoi, se “Penn demonstron llojin e guximit që u mungon shumë të tjerëve, përfshirë politikanë perëndimorë”.

Penn, i cili më parë vizitoi Ukrainën dhe u takua me stafin ushtarak në nëntor, foli me gazetarë dhe ushtarë dhe “pa se si ne mbrojmë vendin tonë”, tha zyra e presidentit.

Vizita e tij e fundit vjen pasi forcat pushtuese ruse u futën thellë në Ukrainë, me beteja të ndezura në periferi të Kievit dhe raketa dhe predha që bien mbi qytete të shumta të Ukrainës.

Penn ka shkaktuar polemika si rezultat i depërtimit të tij në politikë dhe çështjet aktuale, veçanërisht pasi ai dhe aktorja meksikano-amerikane Kate del Castillo intervistuan bosin meksikan të drogës Joaquin “El Chapo” Guzman, ndërsa ai ishte në arrati.

Në vitin 2018, Penn u raportua se ishte në Turqi duke bërë një dokumentar ende të papublikuar për vrasjen e gazetarit saudit Jamal Khashoggi në konsullatën e mbretërisë./Ndtv.com-