Komuniteti shqiptar protestë në Athinë: Mbështesim paqen, kundër dhunës në Ukrainë

Komuniteti shqiptar në Greqi merr pjesë në protestën në Athinë kundër ndërhyrjes ruse në Ukrainë. Thirrjes për protestë pro paqes së komunitetit ukrainas i janë përgjigjur njëzëri qindra shqiptarë, që janë mbledhur këto momente në sheshin “Sindagma”, nën kupolën e “Komunitetit Shqiptar në Greqi”. Kryetari Ermal Sulaj ka shprehur solidarizimin e thellë të mbarë komunitetit me popullin heroik ukrainas, këto ditë të tmerrshme që po kalon vendi. “Vëllezër të komunitetit ukrainas jemi pranë jush, dënojmë luftën, mbështesim paqen, mbështesim popullin heroik ukrainas. “Kurajo dhe lart moralin”, ka thënë Ermal Sulaj. Mbarë komuniteti emigrant shqiptar në gjithë Greqinë është shprehur pro paqes, duke dënuar ashpër sulmin rus të ditëve të fundit në Ukrainë.