Rusia nuk paraqitet në seancat gjyqësore të OKB-së për luftën në Ukrainë

Rusia bojkotoi seancat dëgjimore në gjykatën më të lartë të OKB-së, gjatë të cilave Ukraina po kërkon një urdhër urgjent për të ndalur armiqësitë, me argumentin se Moska ka zbatuar në mënyrë të rreme ligjin e gjenocidit në justifikimin e pushtimit të saj raporton Reuters.

Filluan seancat dëgjimore në Gjykatën Ndërkombëtare të Drejtësisë (ICJ) pa përfaqësim ligjor për Rusinë.

“Fakti që vendet e Rusisë janë bosh flet me zë të lartë. Ata nuk janë këtu në këtë gjykatë: ata janë në një fushë beteje duke zhvilluar një luftë agresive kundër vendit tim,” tha i dërguari ukrainas Anton Korynevych.

Ai i kërkoi Rusisë që “të lëshojë armët dhe të paraqesë provat tuaja”.

Gjykata tha se i vjen keq për mospjesëmarrjen e Rusisë.

Një zëdhënës i Ambasadës Ruse në Holandë nuk iu përgjigj një kërkese për koment.

Presidenti rus Vladimir Putin ka thënë se “aksioni i posaçëm ushtarak” i Rusisë është i nevojshëm “për të mbrojtur njerëzit që i janë nënshtruar bullizmit dhe gjenocidit” – që do të thotë ata, gjuha e parë ose e vetme e të cilëve është rusishtja – në Ukrainën lindore.

Ukraina tha të hënën se pretendimi i Rusisë ishte i pabazë dhe se gjenocidi i supozuar në Ukrainën lindore ishte “inekzistent”.

Çështja përqendrohet në interpretimin e një traktati të vitit 1948 për parandalimin e gjenocidit, të nënshkruar nga të dy vendet. Traktati emëron GJND-në si forumin për zgjidhjen e mosmarrëveshjeve ndërmjet nënshkruesve.

Ukraina tha të hënën se Moska po shkel dhe abuzon konventën e gjenocidit duke e përdorur atë si justifikim për luftën.

“Rusia duhet të ndalet dhe gjykata duhet të luajë një rol në ndalimin e saj,” u tha Korynevych gjyqtarëve ndërsa u kërkoi atyre të vendosnin masa urgjente.

GJND-ja është gjykata më e lartë për zgjidhjen e mosmarrëveshjeve midis shteteve dhe ndërsa rastet atje zakonisht zgjasin vite, ajo ka një procedurë të shpejtë për të shqyrtuar kërkesat për “masa të përkohshme” si ato që ka kërkuar Ukraina.

Gjykata mund të urdhërojë masa të përkohshme për të parandaluar përkeqësimin e një situate përpara se të shqyrtojë çështje më themelore, si p.sh. nëse ajo ka juridiksion, apo meritat e një çështjeje.

Vendet zakonisht, por jo gjithmonë, ndjekin urdhrat e gjykatës, të cilat janë të detyrueshme.