Can ACUN: Vetëvrasja strategjike e Putinit

Pas një dislokimi të gjatë ushtarak, ushtria ruse nisi një përpjekje pushtimi kundër Ukrainës nga disa anë. Putin mendoi se do të pushtonte Kievin dhe do t’i jepte fund luftës së shpejti kur urdhëroi ushtrinë ruse të kryente operacionin e koduar “Rrufeja”. Megjithatë, me rezistencën e ushtrisë ukrainase, popullit ukrainas që është kundër okupimit dhe udhëheqjes politike të Presidentit Vladimir Zelenskiy, Rusinë e pret një proces i gjatë dhe shkatërrues. Qëndrimi vendimtar i vendeve perëndimore në bllok po e çon Rusinë në një falimentim të madh strategjik.

Presidenti rus Vladimir Putin ndërmori një bast të madh në emër të vendit të tij duke pushtuar Ukrainën dhe gjërat duket se nuk po shkojnë aq mirë tani. Kur Putini urdhëroi ushtrinë ruse për “Operacionin Rrufeja”, ai veproi me supozimin se Kievi do të kapej brenda një kohe të shkurtër, se vullneti politik i udhëhequr nga Zelenskiy do të shkatërrohet, që struktura komanduese dhe e kontrollit do të shembet, rezistenca e ushtrisë ukrainase do të merrte fund dhe se në këto rrethana populli ukrainas do të pranonte fuqinë e re që do të ndërtonte Rusia në Kiev.

Megjithatë, qysh në fillim të luftës, “Operacioni Rrufeja” i ushtrisë ruse dështoi. Nisma ushtarake, e projektuar si një operacion i forcave speciale për të kapur Kievin dhe jo një përpjekje konvencionale për pushtim, ishte joefektive me kundërsulmet e ushtrisë ukrainase. Kështu, si udhëheqja politike e Ukrainës, ashtu edhe struktura e komandimit dhe kontrollit nuk u shpërbë, por përkundrazi u forcua dhe tregoi vullnet të madh. Pas dështimit të Operacionit Rrufeja, u bë e qartë se Rusia nuk po punonte mjaftueshëm për planin B. Fushata ushtarake ruse, e cila u shndërrua në një pushtim konvencional, u përball me rezistencë të fortë si nga boshti jugor, ashtu edhe ai lindor i vendit. Përparimi i forcave në veri që përparojnë drejt Kievit duket të jetë shumë i ngadaltë. Paaftësia e Rusisë për të ruajtur plotësisht dominimin ajror mbi Ukrainën në përgjithësi dhe pamundësia për të ofruar mbështetje të afërt ajrore për njësitë e blinduara në veçanti, përfshirë edhe dronët e armatosur, strukturën e dobët të komandës dhe kontrollit, furnizimin dhe problemet e përgjithshme logjistike, çuan në përparim të ngadaltë dhe humbje të rënda të ushtrisë ruse. Morali i këmbësorisë ruse gjithashtu duket të jetë i ulët.

Natyrisht, duhet nënvizuar se rezistenca e integruar e ushtrisë ukrainase me popullin, elementët e fuqisë asimetrike dhe veçanërisht strategjia ushtarake e bazuar në dronët e armatosur turq TB2 së bashku me armët antitank janë efektive. Ndërsa qindra ushtarë rusë u vranë në disa ditë të luftës, përballë kemi një ushtri ruse, trupat e së cilës kanë rënë robër. Përballë kemi një ushtri të shpërndarë, trupat e blinduara të së cilës ranë në pritë duke dhënë viktima të rënda. Ndërsa gjërat nuk po shkojnë mirë në terren, fakti që Rusia është e izoluar nga pjesa tjetër e botës me sanksione shumë të rënda nga vendet perëndimore, të cilat veprojnë si një bllok, janë gjithashtu shenja se si do të përfundojë pushtimi i Ukrainës për Rusinë. Për sa i përket pasojave ushtarake, ekonomike dhe politike, basti i Putinit në Ukrainë do të rezultojë në disfatë të rëndë dhe do të bëhet një vetëvrasje strategjike për atë dhe vendin e tij. Të gjitha shenjat na e tregojnë këtë fakt.