Alfons Zeneli: Mars

Ditët e lindjes nuk janë më njëlloj

secila mbi shpinë bart një gur Sizifi.

Fryjnë erëra të marra marseve të mi

dridhen ditët, vitet. Dridhem unë i gjithi.

Por ditët bëjnë muaj. As muajt nuk janë

ashtu si dikur, ashtu si më parë.

Drithërojnë këngët, drithëron gjithë jeta.

Marseve të mi fryn një erë e marrë.

Vitet bëjnë shekuj dhe shekujt epoka,

kryqeve të tyre pikëlloj si Krisht.

Gjithë ç`pata frymë, gjithë ç`linda shikim

erë përmbi marse fryn përjetësisht.