Bledar Koçi: FRYN KJO ERË

Fryn kjo erë me këtë mbrëmje

Nata hesht si zogth i vrarë,

Ndoshta ti më ke në mendje

Ndoshta jo, e s’ke më mall.

Unë e ti dy shkretëtira

Ëndrra dhembur mbi kaktusë,

Ç’erë e çmendur po sjell shira

Bashkë me ty një nate – pus.

Ndoshta ti më mban në zemër

Vetes ndoshta ti më fsheh,

Lind një yll një bote tjetër

Këtu, tjetër vdes për ne.

Fryn e fryn në pambarim

Tejembanë kjo erë e marrë..

Kur më mbytesh gjoksit tim

Nata hesht si zogth i vrarë.