Zana Tako: Kur të vish…

Kur shkove,

nuk më the sa do vonoje.

Të pres,

aq sa ç’zgjat pranvera.

Por stinët e tjera nuk më qortojnë,

kur të pres,

aq sa ç’zgjat pranvera.

Ato nuk bëjnë dot llogari,

me ditë dashurie.

Se e dinë,

dashuria nuk zgjat veç me një stinë.

E ti, i dashuri im,

je pranverë për shpirtin tim.

Kur të vish,

mos harro,

se më gjen në lëndinë.

Kurora lulesh zbukurojnë kryet e mi,

m’i ka thurrur stina e pranverës.

Më e bukura stinë,

që i kemi besuar dashurinë.