Cikël poetik nga Mimoza Pulaj

BANESË DASHURIE

Kuqëlojnë dy mollë

në një pellg vjeshte.

Gjoks hëne.

Bar i zverdhur

për to përkulet . Në heshtje.

Lëndina

s’ka nevojë

për asgjë tjetër,

o mbrëmje e purpurt!

Përkundu në të, o varkë flakë

me dy zemra drite!

PETALE TË KALTRA

Thërret malli. Tingëllues.

Thur vargje

me ngjyrën që i mungon.

Psherëtin ajo nëpër re

e petale të KALTRA

bien. Si frymë.

Tërë jetën kanë rënë.

JOSH NJË KAMBANË

Josh një kambanë
gjuhëz zjarr…

Por rreth saj
s’mbaron i ftohti.
As në behar.

Please follow and like us: