Ndahet nga jeta grafisti që fiksoi puthjen Brezhnjev-Honeker

Autori i grafitit të famshëm të puthjes midis liderit sovjetik Leonid Brezhnev dhe presidentit të Republikës Demokratike Gjermane (RDGJ) Erich Honecker ka vdekur në Berlin, njoftuan mediat gjermane.

Dmitri Vrúbel (Moskë, 1960) ishte një artist rus plastik, vepra më e famshme e të cilit ishte grafiti që pikturoi në Murin e Berlinit menjëherë pas rënies së tij, në pranverën e vitit 1991, dhe që atëherë është bërë një nga atraksionet kryesore turistike të gjermanëve.

E vendosur në seksionin e murit të njohur si “East Side Gallery”, në lindjen e vjetër, piktura tregon se si Brezhnev dhe Honecker puthen buzë më buzë, me një tabelë që lexon në gjermanisht dhe rusisht “Zoti im, më ndihmo t’i mbijetoj kësaj dashurie të vdekshme”.

Murali, i hequr në vitin 2009 si pjesë e restaurimit të murit dhe i riprodhuar më vonë nga artisti me kërkesë të autoriteteve lokale, u frymëzua nga një fotografi që tregonte dy liderët komunistë të festonin 30-vjetorin e ekzistencës së RDGJ-së, më 1979.

Në vitin 2001, Vrubel dhe gruaja e tij, edhe ajo artiste, Victoria Timofeyeva, krijuan një kalendar me portrete të presidentit rus Vladimir Putin, të cilin e quajtën “12 gjendjet shpirtërore të Putinit”, i cili papritur u bë bestseller në Rusi.

Pasardhës i pionierit modernist Mikhail Vrubel, artisti jetonte në Berlin që nga viti 1990. Ai vdiq të dielën e kaluar në moshën 62-vjeçare nga komplikimet në zemër, pasi u infektua me Covid-19.