Lajla Përnaska: Luiza, Kampionia e Garës!

Nuk na ndodh shpesh të përjetojmë një furi emocionesh pozitive, si me Kampionen Luizë:
-një garë e triumf dinjitoz Europian;
-një fisnikëri e modesti, e Kampiones mbështjellë me Flamurin Kuq e Zi;
Në pak çaste, Kampionia Luizë na fali emocione të rralla, na zgjoi ndjenjën e Krenarisë, që së shumti ka ngecur përfjetur.

Sepse ajo bëri që Shqipja të fluturojë lart, shumë lart….
Nuk e kam takuar deri më sot Kampionen Luizë, por e kam hasur disa herë tek kodrat e Liqenit të Tiranës, duke vrapuar. Totalisht e fokusuar në stërvitjen e saj, e pashqetësuar nga të tjerët, që ecin në atë rripin e vrapimit (as korsi s’mund ta quash), ajo thjesht vrapon, pa u ndalur, pa u ankuar, pa bërë zhurmë.Ka vite që ajo ndjek pasionin e kultivon talentin e saj, pavarësisht vështirësive.

E sigurtë është, se të gjitha atletet e tjera europiane, (përfshi dhe nga vendet që s’arritën në finale), kanë një trajtim sportiv mjaft më të mirë nga Kampionia Luizë, kanë Klube më të fuqishme, kanë buxhete shteterore mjaft më bujare e dashamirëse, që sporti i atletikës (e jo vetëm), të zhvillohet e ato të përgatiten për Kampione.
S’di ta kem hasur Kampionen Luizë, duke u qaravitur për mungesën e kushteve dhe mbështetjes nga shteti për sportin e atletikës në përgjithësi dhe për atë vetë, në veçanti. Ajo veç ka punuar, pa u ndalur, duke besuar tek Gara, vetëm tek Gara, duke derdhur djersë, deri në sakrificë për të rrokur ëndrrën e saj.

Por duke na bërë të gjithëve të ëndërrojmë: si të parët e Europës, së paku në një fushë, qoftë për një kohë të caktuar. Kampionia na kujtoi, se kemi plot talent,kemi vullnet, kemi vlera, dimë t’ia dalim.
Mirënjohje Kompinia Luizë.

Më shumë se një Medalje Ari e një rekord Europian, ti na ke dhuruar një Model e dashur. Modelin se si mund të jesh kampion në fushën që ti zgjedh, ku ke pasion, ku investon me përkushtim, pa u ndalur, edhe kur rrethanat nuk janë pro teje.
Modeli yt është i preferuari i shumicës së shqiptarëve ( besoj unë).Por a është ai i preferuari i shumë vajzave dhe grave të reja sot? Vështirë ta gjej një përgjigje.

Modeli yt, nuk është as produkt partie, që sajojnë disa “figurina politike”, për interesa të Kryetarëve të tyre.
Modeli yt, nuk është as preferencë e ndonjë “Super-Moderatori”, që promovon e i ofron partive “kandidate trendy”, për medemek politikane.
Modeli yt, nuk është as ai i “vajzës së luksit”, që gjëmon lekun, edhe kur është i pisët, apo kur ia ofron i dashuri, edhe pse kriminel, a drogaxhi, apo një biznesmen “boyfriend”,në moshën e babait të vet.
Ti thjesht je vetvetja e dashur Kampione.
Ti je Modeli i Garës dhe përmes saj triumfon.

Pas fitores tënde madhështore të gjithë ne rendëm të të uronim, të ceknim pak nga triumfi yt, të shprehim mirënjohjen tonë .Këtë nuk vonuan ta bëjnë edhe Krerët e Shtetit e Politikës, që nuk e di a të kanë pyetur ndonjëherë se çfarë nevojash, a vështirësish ke si sportiste?!Patjetër do të të presin me Lavdi.Por çdo vend normal investon për kampionët e vet që në vogli, jo të kujtohet vetëm, pasi ata dalin kampionë falë talentit e vetinvestimit.

Uroj që triumfi yt të të ofrojë edhe më shumë mundësi dhe një standart më të mirë jetese. Mbase jo atë të pasunarëve me paligjshmëri e me pushtet, por të çdo shtetasi korrekt në këtë vend, që e ngre dhe jetesën e të ardhurat e tij me investim e profesionalizëm.

Edhe një herë faleminderit Kampionia Luizë, duke uruar që të jesh Modeli i brezit të ri.
Imagjinata nuk na mungon për të menduar aplikimin e këtij Modeli të Garës, në çdo fushë:
-Modeli i garës brenda Partive Politike, ( jo sajesat e derisotme);
-Modeli i Garës në qeverisje, në çdo nivel ( me aftësi e merita, jo me nepotizëm , a grupe interesi);
-Modeli i Garës në sipërmarrje (jo veç monopole e oligarkë);
-Modeli i Garës në të gjitha sportet ( jo me ndeshje futbolli, që trukohen).
-Modeli i Garës, si e vetmja mënyrë për të nxjerrë Kampionët e vet në çdo fushë.

Vetëm me këtë Model (do Zoti, një ditë realitet), do të mund të fitojmë dhe shumë Medalje të tjera Europiane dhe të bëhemi tërësisht pjesë integrale e saj.
Suksese të mëtejshme Kampionia Luizë, ty dhe çdo Kampioni Kuq e Zi.
Qofsh Këmbëmbarë.

https://javanews.al/luiza-kampionia-e-gares/