Poetja Irma Kurti nderohet me titullin “Dama e Urdhrit të Dante Alighierit”

Poetja shqiptare Irma Kurti nderohet me titullin “Dama e Urdhrit të Dante Alighierit”. Ky titull i akordohet nga Republika e Poetëvee themeluar nga Enciklopedia Poetike, Wikipoesia. Republika e Poetëve, një projekt kulturor, një komb i vogël i krijuar sipas karakteristikave të autonomisë dhe të pavarësisë krahasuar me shtete, ente apo organizata të tjera në mënyrë më poetike i përket realitetit të hapësirës digjitale dhe të mendimit njerëzor. Ajo synon të promovojë krijimtarinë njerëzore, të vlerësojë poezinë dhe poetët si dhe të njohë poezinë si shprehje të njerëzimit.

Urdhri i Dante Alighierit është krijuar për të promovuar përhapjen e poezisë italiane në botë dhe në veçanti gjenialitetin e Dante Alighierit. Promovuesi i iniciativës është Renato Ongania (ish-themeluesi i Enciklopedisë poetike).

Poetja shqiptare është fituese e mjaft çmimeve prestigjoze në Itali. Në vitin 2020, për kontributin në fushën e poezisë, i jepet titulli “Akademike dhe Presidente Nderi” e Enciklopedisë Poetike. Në 2021 nderohet me çmimin “Liria” nga Komuniteti Arbëresh në Itali. Në vitin 2022 nderohet me çmimin “Ambasadore Evropiane” nga Shoqata Kulturore “Chimera” në Lecce për arritje të rëndësishme në fushën e letërsisë. Në të njëjtin vit emërohet Ambasadore për Shqipërinë nga Akademia e Arteve dhe Shkencave Filozofike në Bari. Është gjithashtu anëtare e jurisë e disa konkurseve letrare në Itali si dhe përkthyese pranë Fondacionit “Itaca” në Spanjë.