Gjergji Mihallari: Ti je Itaka ime

Odiseja e udhëtimit tim

Ka zgjatur më shumë se njëzet vjet,

Nuk ka Homer të gërmëzojë fjalët

Për të shkruar një epokë të vërtetë…

Itaka ime ka humbur

Në hapësira detesh pafund

Mbase ka patur fatin e Atlantidës

Zhdukur pa lënë gjurmë…

Ti je Penelopa në pritje ëndrre

Nuk di në ke më fill për të endur

Mbase edhe vegja zu po kalbet,

Ose një tjetër princ është gjendur…

Ti je Itaka që kam kërkuar

Ishulli në mes detesh të tërbuar,

Veçse, kurrë s’u bëra si Uliksi

Të çaj detet dhe me perënditë nuk kam luftuar.

Vazhdoj të endem deteve pa krye

Në kërkim të Itakës-Penelopë,

Kam frikë, do udhëtoj edhe shumë vite

E ty, nuk do të gjej dot…