Ismail Xhaferi: Tani në shtëpi mungon babai dhe nëna

 

Tani në shtëpi nuk është më as babai as nëna,

Dhe lulet të gjitha janë tharë,

Është ndryshkur brava e derës së jashtme,

(O pragu i portës si duron pa u çarë)!

 

Mbi dritare mungon prej shumë kohësh,

Një degë e vjetër hardhie,

Nuk ndjeu frymë njeriu brenda shtëpisë,

Ja bëri krak dhe u thye.

 

Nga tubi i sobës nuk del më tym.

Nuk ndihen më as hapa brenda avllisë,

Me një daltë kujtimesh mbledhur nëpër vite,

Malli grryen muret e shtëpisë.

 

Por në netët e gjata të verës,

Asnjëherë tek shtepia nuk mungon hëna,

Troket në dritare dhe largohet trishtuar,

Si s’ka më njeri ta ftojë hënën brenda!

 

… Tani në shtëpi mungon babai dhe nëna.