Ibrahim Vasjari: Vërtet i lirë!?

Me kaq të drejta, s’duhet të ankohem.

(Të bëhem bukëshkalë? Pupu, sa turp!)

Vërtet s’i përdor dot, po nuk nxitohem.

I ruaj depozitë në Kushtetutë.

Kam AKP, përse ta dua pronën.

(Ç’fat që m’u dha, o zot, ç’qe gjithë ky nder!)

Dhe hipotekës as ia kam nevojën.

S’më hyn në punë… i kam letra me vlerë.

Kam liri goje, çirrem, gllamurit.

(Sovran vërtet, po jo kaq arrogant).

Trëmben e bëhen sa një grusht partitë.

U jap një votë ashtu sa për sevap.

Ndihem i fortë, bile diçka më tepër.

(Më vjen ca turp që mburrem kësisoj).

Veç nga pushteti, për zakon të vjetër,

Zemra më dridhet si dikur njëlloj.