Dy poezi nga Avdush Canaj

 

RETË ZURËN NË THUA

Retë e ngarkuara me shi

mezi ecin kupës së qiellit

Kuku, zurën në thua

në një krah të plepit

iu derdhën bidonët

papritur

Njëra qeshi, e pashë

i tha shoqes

Mos u mërzit

tash mund të fluturojmë

me lejlekët.

 

BUZËT E SHEGËS

Dy viza të ëmbla barazimi

buzët e shegës

Një si O e kuqëluar

faqja me motrën e vet

Krahë në fluturim vetullat

te dera e zemrës

i pret përqafimi.