PREMIERE BOTERORE në Festivalin më të madh të Anglisë për muzikën klasike bashkëkohore!

Soliloquy VII për Klarinetë dhe Piano Rezonante: një mbrëmje plot emocion, me një pritje fantastike nga publiku që kish mbushur sallën!!

I vetëm në atë hapësirë të gjërë në sallën mahnitëse të periudhës së Mbretëreshës Viktoria, instrumentisti nga Parisi Jérôme Comte kish shumë se ç’të thoshte. Dhe i tha të gjitha, me nge, me zë të lartë dhe me zë të ulët. Ndërsa mua në sallë m’u duk sikur e mbajta frymën për 15 minuta!

Ka plot nota kjo pjesë; të mëdha dhe të vogla; por muzikantit parizian nuk i bëri syri cërr! Ai i luajti të gjitha me rradhë: notat e gjata sikur mbanin iso, ndërsa ato të voglat vetëm fluturonin!

Tingujt e klarinetës që shkonin poshtë e lart, nëpërmjet rezonancës së pianos, pa pianist, vetëm me pedalin e shtypur gjatë gjithë pjesës, shpërndaheshin në të gjithe sallën. Dhe teknikët e BBC-së, i mblidhnin të gjitha një nga një në autobuzin e tyre, për t’i transmetuar në radion kombëtare të Anglisë për muzikën klasike.

Një mbrëmje e paharruar! Ky ishte koncerti i parë i Ensemble Intercontemporain në këtë festival – Mecca e Muzikës Bashkëkohore në Angli – por jam i sigurtë që nuk do të jetë i fundit!

Duke i uruar njeri tjetrit natën e mirë, Jérôme më tha: “Ti ke punuar shumë për këtë pjesë”!

“Po”, i thashë, “kam punuar shumë, por të bëra dhe ty të punosh shumë”!

MERCI

Jérôme Comte!!

MERCI

Ensemble intercontemporain!!