Mihal Luarasi: Në kujtim të një ylli të skenës që u shua në një moshë fare të re…

…Është një fatkeqësi për aktorin e skenës që krijmtaria e tij, për vetë natyrën e saj specifike, është e destinuar të ‘shuhet’ me shuarjen e brezave që e kanë ndjekur drejt për drejt. Kur ai s’është më midis të gjallëve, diçka mbetet e gdhendur në ‘çetele të kujtimit’ të bashkombasve të tij, në shkrimet e kritikëve, në kronikat e gazetarëve, apo në regjistrimet televizive e filmike që e zbusin paksa humbjen. Por vetëm kaq. Sepse asnjë mjet mekanik nuk mund të rijapë mbrujtjen e aty për atyshme të njeriut të gjallë që aktori skalit në sytë e shikuesve.

Ashtu si vetë koha që rrjedh pa rikthim vetëm në një kah, krijimi i tij është i papërsëritshëm. Nuk jeton njeriu aktor nuk jeton as produkti i tij. Ky qe edhe fati i Bexhet Nelkut, i këtij aktori që shkëlqeu për një kohë fare të shkurtër në yllësinë e teatrit. Artistit që u largua nga jeta shpejt, por që për nga emri që la duket se jetoi pleqërinë e thellë. Arsyeja qëndron tek gjithçka ai ishte si njeri dhe talenti i rrallë si artist…

Post Scriptum:

Bexhet Nelku lindi në Tiranë. Në shtator 1963, pas diplomimit, pranohet aktor në Teatrin Kombëtar. Provën e parë të suksesshme ai në Teatrin Kombëtar e kishte dhënë që në vitin 1957 me interpretimin e tij në dramën “Orët e Kremlinit, kur ishte ende nxënës në Liceun Artistik “Jordan Misja”. Nelku për pak vite artistike arriti të realizojë shumë role. Gjatë viteve 1963 – 1970, ai interpretoi në 20 pjesë, pra në tre role në vit, shto këtu edhe disa role në filmin artistik, që ishte në hapat e para të tij. Nelku ka dhënë një kontribut të veçantë si pedagog në ILA i të folurit skenik, kur edhe vetë dallohej si një nga aktorët më të mirë të të folurit skenik. Më 21 nëntor 1970 u nda nga jeta pas një sëmundjeje të rëndë. Ndër rolet më të suksesshëm të tij janë:

Cuca e maleve, prifti
Fytyre e dytë, Muhameti
I pazvëndësueshmi
Shokët
20 ditët
Mbreti Lir
Muri i madh i pakapërcyeshëm
Tri të shtëna pushke
I teti në bronz
Kur zbardhi nje ditë, Kapiteni gjerman