Cikël poetik nga Avdush Canaj

FSHEHTËSI

Më tha një fshehtësi

ylli im mbi qershi

që përralla më fal

nga xhepat e Cukelit:

Hëna

ka filluar të shkruajë

një roman të vogël

për ëndrrat e harabelit!

Ju, pësssssst!

Askujt asnjë fjalë!

Ju betohem

në peshqit e lumit,

kur ta përfundojë,

do ta lexojmë bashkë

te pragu i gjumit!

 

NJË YLL TË PRET

Bukuroshet ilire

ishin kështu,

si ti.

Me fustan të luleve

e sandale fluturash.

Buzëqeshja hënore

me rruaza manushaqesh.

Celulari s`pushon.

Ngutu!

Një yll me kapelë

të pret te porta e verës.

Në valsin e ëndrrave

s`niset pa ty.

 

SYTË E LUMTURISË

Nëna ka aromën e luleve

dhe lule e agimit është

Ka buzëqeshjen e diellit nëna

dhe diell dashurie është

Me ëmbëlsinë e pjeshkës në faqe

dhe pjeshkë është

Nëna ka sytë e lumturisë

është vetë lumturia me fustan

Nëna ime, loçka.