Dea Toçi: KAFE PA SHEQER

Kafen e parë pa sheqer

dhe ngadalë përgatis veten

për të gjitha hidhësitë e ditës,

të cilat ngjeshur njëra pas tjetrës

përbri i rrinë çudisë, nervit, frikës.

Kafen e hidhur

doemos e dua, se vetëm ashtu

mendja kalitet dhe stoike qëndron,

përballë sheqerit që me dredhi shijen ia zbut,

përballë kujtdo fals emocion ditës t’i shton.

Dhe atë të fundit pa sheqer e dua

as mos më thoni t’i hedh vetëm pak,

hidhësi e kafes do shmang për mua

dëmin që sjell sheqeri në gjak,

pafytyrësinë njerëzore që vret si farmak.

Ju që e pini me sheqer,

veten mos gënjeni

e më pas të tjerë.