Cikël poetik nga Sulejman Mato

Sekreti i fjalëve

Brenda  meje zhurmërojnë mijra fjalë,

vetja më ngjan si një plep në erë.

Sa herë vjen vjeshta unë fletët praroj

e mbushem me gjethe si një plep në pranverë.

Sekretin e fjalëve ka vite që e di,

sa i prek  ato zgjohen nga gjumi që i ka zënë.

Nisin të lëshojnë tinguj plot mall

dhe thonë: ”Sa të bukura paskemi qenë…”.

Unë fjalët i pastroj si zajet e lumit,

me fjalë bëj herë një fyell e herë një bilbil…

pa më shihni si rri, me penela në duar,

mes fushave  të lulëzuara, në Prill.

Një libër i mirë

Një libër i mirë është si një lis i moçëm

Lind dhe plaket brenda një shekulli.

Degët e tij janë plot gjak në damarë.

Një libër i mirë është pjellor si fusha,

shtegtar si retë, i heshtur si shkëmbinjtë.

Një libër i mirë është rezistent ndaj ngricave

i errët si mendimi, i padepërtueshëm si guri.

Një libër i mirë i shtohet tokës

përkrah qyteteve të rinj dhe shkëmbinjve të moçëm.

Në damarët e tij qëndron sekreti

i lidhjeve të njeriut, lisit, shkëmbit dhe librit.