Cikël poetik nga Avdush Canaj

 

PA SHIH KUSH PO VJEN

Kur nisesh kah gjyshi

Kur nisesh

Rruga blerohet

Këmbësoreve çelin lulet

 

Pas teje vijnë zogjtë me violina

Fluturat me trotineta

Në çikleta lepurushët

 

Gjyshi dhe gjyshja

Të shohin nga ballkoni

Bëhen këngë e qeshur

Pa shih kush po vjen

Pa shih

 

Ti fluturon

Me krahët e ngazëllimit

Si zogu

Në pemën e që e pret

 

Ditës i qesh buza

Zgjatet për përqafimet.

 

KUR TË VIJË AJO DITË

Tim vëlla, Alushit

 

Kur të vijë ajo ditë,

oh, ajo Ditë e Shenjtë,

eja e më trokit

te dritarja e varrit,

unë,

do të ngritem

si Konstantini

të gëzohem bashkë me ju,

ta valvis flamurin

e shqiponjës t`ia puth flatrat

në të Shenjtën Ditë.

 1982.

 

TE BURBUQET E VARGJEVE 

Poeti i njohur Avdush Canaj, përmes një shkrimi në rrjetin social Facebook, ka kujtuar të vëllain e vrarë, Alush Canaj. “Pesëdhjetë e një vjet më parë, pikërisht në ditën e sotme të 15 shkurtit të vitit 1972 , ndodhi krimi në Gjilan. Selim Brosha me lakenjtë e vet, përmes dorës së fshehtë, qëlloi mbi poetin dhe atdhetarin Alush Canaj, pararendësin e lirisë së Kosovës”, ka shkruar Canaj. Ai, i ka kushtuar edhe një poezi.

Menduan se të vranë 
Kur çelën mimozat
Gota e krimit cakërruan
Atë natë në hotelin Evropa
Të qytetit tënd, Gjilanit
Ujqër e hiena u mashtruan
Te burbuqet e vargjeve
Buzëqeshja jote
Këngën tënde
E këndojnë të gjithë
Në korin e shqipeve
Me këmisha të kuqe
Të vargjet e burbuqta
Me aromë lirie
Je ti.

 

KOSOVË

KOSOVË,

ashti im i shpuar,

lulëkuqja e gjakut tim,

gëzuar Ditën Tënde!