Vepror Hasani: FAMILJA E VËLLEZËRVE FRASHËRI

(Nëna e tyre ishte nga Korça, bijë e Mirahoreve, mbesë e pashallarëve të Plasës).

Një prej poezive të vëllimit “Lulet e Verës”, poeti Naim Frashëri e shkroi enkas për Korçën. Nga Korça ishte nëna e tij, Emineja, bijë e Mirahorëve, themeluesve të qytetit të Korçës, saktësisht bijë e Islam Mirahorit dhe e Zymbyles. Vetë Zymbylja (nëna e Eminesë), ishte bijë e Mehmet pashë Plasës, pasardhës të Sinan Pashës, pashait më të fuqishëm të Toskërisë.

Për gjyshin e vellëzërve Frashëri (nga nëna) thuhej: “Do të dijë der’ e Plasës?!”

“Plasa është një katund në veri të Korçës, në shekujt XVII e XVIII ka qenë banimi i fisit të Sinan Pashës, i cili ishte një ndër Pashallarët më të fuqishëm të Tosknisë. Kjo familje e përmendun ka pasë n’at vend saraje të mdha, gërmadhat e të cilave shihen edhe sot.

Populli në kohë të fuqisë së kësaj familjeje thoshte: “Do të dijë der’ e Plasës!” për me diftue se oxhaku ose fisi i Pashallarëve të Plasës nuk trembej as nuk merrte në sy çfardo rreziku”.

Emineja u martua në Frashër me Halitin, me të cilin pati 6 djem dhe 2 vajza:

1- Abdylin (1839-1892),

2- Nafisenë (1841-1894),

3- Sherifin (1843-1874),

4- Naimin (1846-1900),

5- Shanishanë (1848-1871),

6- Saminë (1850-1904),

7- Tahsimin (1853-1876), vdiq i ri, student

8- Mehmetin (1856-1918).