Mimoza Bici: Jam zgjuar…

Jam zgjuar

nga një ëndërr e purpurt

që po më vdiste

Një fjongo blu

varur shpirtit të bardhë

m’u lidh gushës

ku vet dora e asaj që linde

e shtrëngonte kaq shumë

për t’mos fluturuar.

Befas

fjongo të tjera

lidhën duart, këmbët

thua ishin metale të lehta

zbukuruar si vet djalli që lind nga ngjizja me një përbindësh

shndërruar në fjongo të purpurt

e të të vdes dalngadalë.

Tashmë tek unë s’ka mbet më qenie njeriu

Nuk kanë ç’të më shtrëngojnë më.

Zoti ka zbrit sa pasqyroi dikë si shpirtin tim

e iku më pas….

E unë zgjohem

mbuluar me ngjyra pranvere

Si një qenie e padukshme

duke përgatitur

vazon time të mbjell diku

pranvera ka ardhë…