Saranda Mehmedi: FTESË PËR VALLËZIM

Tani që gjithçka është e ndaluar:

prekjet, përkëdheljet, përqafimet…

Eja ta vallëzojmë nën petkun e largësisë

valsin e syve!

Nëpër zërat e atyre që vdesin përditë

si gjethe vjeshte, si ushtarë të zënë rob…

Eja ta vallëzojmë

valsin e heshtjes!

Nën zhurmën e përditshmërisë së sëmurë

kornikës së lajmeve e kollës së thatë të kohës…

Eja ta vallëzojmë

valsin e harrimit!