Zana Tako: Mëso më parë të shohësh brenda errësirës

Nëse rruga që ke zgjedhur është e panjohur, mëso më parë të shohësh brenda errësirës, jo për të sfiduar veten, por për të gjetur atë që fshihet e nuk duket.

Njeriu di të ecë, di edhe të flasë, por gjuhën e shpirtit jo të gjithë e njohin dhe dinë ta flasin. Mendja është e vogël e shpirti është i madh.

Njeriu di të fshehë, por jo gjithçka e fsheh mirë. Mendimi i njeriut është si laku që të lidhet pas fyti e të pengon të marrësh frymë.

Jeta e njeriut ka stinët e saj, por njeriu jo në çdo stinë di të buzëqeshë. Rebelimi i njeriut fillon atëherë kur nuk di të kuptojë të vërtetën. Është ajo që e shpëton e nuk e braktis.

Lejojmë që gabimet t’i përdorim si mësime të vyera, e nuk kuptojmë, se janë ato që e përdorin njeriun si dëshmi e tradhtisë së tij ndaj çdo mësimi të vyer, ku rritesh e nuk zvogëlohesh.

Fjala ka peshë, por peshën e saj nuk e mban dot ai që nuk e njeh peshën e fjalës, ndaj njeriu quhet shëndetlig në kohën e provës.

Nëse njeriu ende nuk e ka kuptuar se duhet të ecë në udhën e mirësisë, do të mbetet peng në duart e tradhtisë!