Cikël poetik nga Avdush Canaj

 

DIKUSH

 

Dikush shet pranverën me zogj

Dikush djepin e valëve të detit

Ai tjetri fluturimin e lejlekëve

Kush qengjat e bardhë te retë

Një tjetër kërcimin e ujëvarës.

 

Shoku im ul çmimin

Për shallin e manushaqes.

 

Unë fal si përherë

Lumturinë e degëve

Kur kthehen gugutë.

 

PIKTUROJMË NË VARGJE

 

Ti mbledh ëndrrat

e luleve

unë cicërimat

e pemëve

bashkë i pikturojmë

në vargje

me lapsin

e gushëkuqit

t’ua lexojmë

fluturave

në tangon e mëngjesit.

 

SYTË I QESHIN VERËS

 

Pulëbardhë shkoj në Ulqin

me bistekun e gjatë

më bën të zeshkët deti

djemtë më thërrasin

Çokollatë

I gostit me buzëqeshje

përditë vetë e dytë

nën kapelën diellore

verës i qeshin sytë.

 

PUTH E PUTH

 

Puth dielli

Puth lulja

Puth

E puth

Deri në perëndim.

 

Lulja u lumturua

Edhe nesër

Puth

E puth

Edhe nesër.

 

Dita e buzëqeshur

Mbylli kanatat.

 

NË SYTË E TU PREJ DETI

 

Në sytë e tu prej deti

Lundrojnë përditë

Anijet me përqafime.

 

DETI PA KËMISHË

 

Deti pa këmishë

Të pret te bregu i kaltër

Delfinët t’i shalosh

Si kuajt e përrallave

Jo fillikat

Me atë guguçen për dore

Që të tha dje

Në sytë e tu

Qenka deti.

 

I DHASHË PAK ZEMËR

 

S`pata çka t`i jap lypësit

në dorën e shtrirë

 

I dhashë pak zemër

do ta bëjë Zoti mire

 

Cilën ditë athua

më pyeti i kapitur

Nesër a pasnesër

edhe sa duhet pritur

 

Edhe sa, o vëlla

 

Para meje ra një gjeth

edhe atij shpirti iu rrëqeth.

 

EDHE DITËS I PIKUAN LOTËT

 

Ata erdhën siç vjen tufani

babën me plis

e lidhen për mani.

 

Mos e vritni, i luta,

mos, babën tim plak!

Askujt s’i ka hak!

Jemi në Tokën tonë,

s`jemi ardhacak`.

Babën e dua, jam gjaku i tij i dëlirë,

më vritni mua më mirë!

Më vritni mua!

 

Një sy lubie

më shkundulloi për flokë:

Dëgjo ti, shqiptari i vogël,

plumbin s`e harxhoj në ty

tek ky mur,

dikush duhet të tregojë histori

se ç`bëmë ne dikur.

 

Dhe babën e bënë shoshë,

shoshë  edhe plisin!

 

E motrën? Ah, motrën

që i ngjante krejt nënës,

në sy të mi

ia prishën bistekët,

bistekët e bukur si të hënës!

 

Ç`të të them tjetër?

Edhe ditës i pikuan lotët

bashkë me blerimin!

Dielli u fsheh pas reve

të mos e shoh trishtimin!

 

Qershor, 2017.

 

 

KUR TË NISESH

 

Kur të nisesh

kah zemra ime

kur të nisesh

tregomë.

 

Nëse bie shi

do ta ndalë.

 

Borë nëse resh

në çast e shkrij.

 

Po qëlloj furtunë

ia vë gjoksin unë.

 

E bëj verë, pëllumbi im

verë për ty

të vish

e lulet e mallit

të qeshin.

Gjilan, 8 korrik 2018.