Ilda Mejdani Jeha: Të lësh…

*****

Të lësh dashurinë të jetë aq e fortë, sa të shfaqë brishtësinë e saj,

të humbasësh nga frika se mos humbet,

të mbetesh pa rropullitë e shpirtit,

por me zemër margaritash,

të lësh të rrjedhin historitë që e kanë fundin në fillim,

të lësh ëndrrat të digjen ngadalë brenda teje

dhe psherëtimat të shuhen qetësisht nën peshën e arsyes,

të lësh fjalët të pajtojnë heshtjen

me çmendurinë kimike të mungesës,

të lësh përvujtërinë dhe thjeshtësinë të jenë buka e bukurisë tënde,

të lësh veten të përshëndesë kalimtarët e

ngushëllojë të ngjashmit,

të mësosh sytë me ftohtësinë e dritës,

…dhe të gjitha këto t’i shpagosh hapur me një gjysmë buzëqeshje…