Eva Vatoci: Ndërsa bie shi…

Ndërsa bie shi, qortoj veten për pavendosmërinë time:

“Pavendosmëria,” them unë, “nuk është një virtyt

dhe një ditë do të pendoheshe

përse gjërat i lë të ikin kaq lehtë.”

Por kështu është në rini,

kështu është me secilin prej nesh.

Dhe ndërsa aroma e lagësht e shiut mbush çdo pore,

nuk mendojmë asgjë

të bindur,

edhe pse këtë askush nuk na e ka thënë,

se do të jetojmë përgjithmonë.