Zana Tako: Sot dhe nesër

 

Isha edhe dje,

jam edhe sot,

do të jem edhe nesër,

por nuk dukem kur ëndërroj…

 

E nesërmja nuk ka kuptim pa të djeshmen,

e sotmja je ti,

jam edhe unë,

kur mendoj për ty…

 

Mendimi udhëton me të sotmen,

të nesërmen ende nuk e di.

 

Ti je aty,

edhe dje, edhe sot, edhe nesër.

 

Të shkoj…

nuk mundem dot pa ty.

 

Të vish…

ashtu si erdhe dje,

veshur me ngjyra farfuri,

i bardhë si bora,

i qeshur si drita,

i ëmbël si mjalti i hojeve,

i shpejtë si vetëtima.

 

Kohë e tashme,

kohë e shkuar,

kohë e largët…

 

Brenda tyre je vetëm ti,

fytyrë qeshur,

gjithmonë i ri!