Avdush Canaj: KY ËSHTË ATDHEU YT

 

S’e mbyllim më derën

me dry,

as ëndrrat nuk na trishtohen

si dikur,

as ujqit

nuk ulërijnë te porta,

as babit nuk ia lidhin duart

me pranga

për një vjershë për Atdheun.

 

Këmishat me shqiponjë

i veshim pa frikë,

plisin

e vëjmë kur të duam

e këndojmë me zë të lartë

deri te retë e përgjumura.

 

Dora s’na dridhet

kur shkruajmë emrin

Republikë.

 

Kjo është liria Lush,

liria.

Ky është atdheu yt,

të mirat tjera vijnë ngadalë.